Imnedija fl-2021, l-iskema New Hope hija inizjattiva mmirata biex tgħin individwi b’kundizzjonijiet mediċi jew forma ta’ diżabilità jsiru sidien ta’ djarhom. 

B’diskussjonijiet kontinwi mal-imsieħba kkonċernati, l-Awtorità tad-Djar ressqet ’il quddiem soluzzjoni għall-isfidi li kienu qed jiltaqgħu magħhom numru ta’ famiji u individwi. Dan għaliex minkejja li persuna kienet taspira li takkwista proprjetà u kienet finanzjarjament stabbli biex tagħmel dan il-pass, ma kinitx tgħaddi mill-kriterji tal-life insurance policy. B’riżultat ta’ dan, ma kinitx tingħata loan mill-banek Maltin minħabba xi kundizzjoni medika jew forma ta’ diżabilità.

Bl-iskema New Hope dan l-ostaklu ġie megħlub permezz tal-Awtorità tad-Djar li qed taġixxi bħala l-garanzija tal-individwu f’dawn il-każijiet u għaldaqstant, kull min jaqa’ taħt din l-iskema se jkun eleġibbli biex jingħata l-loan mill-banek Maltin mingħajr il-ħtieġa tal-life insurance policy. L-applikant xorta waħda jrid jagħmel pagament addizzjonali annwali ekwivalenti għal dak li individwu jħallas permezz tal-life insurance. 

B’hekk, kull min jaqa’ taħt din l-iskema jista’ faċilment isir sid ta’ daru u jixtri proprjetà sa massimu ta’ mitejn u ħamsin elf ewro. 

Biex tiġi assigurata l-eligibilità ta’ persuna taħt din l-iskema, l-applikanti jridu jiġu verifikati mill-Kummissjoni għad-Drittijiet ta’ Persuni b’Diżabilità filwaqt li jippreżentaw ukoll żewġ applikazzjonijiet irrifjutati ta’ Life Insurance Policies mingħand distributuri differenti qabel ma japplikaw għall-iskema New Hope. 

Filwaqt li l-Awtorità tad-Djar tiggarantixxi home loans li jammontaw sa mitejn u ħamsin elf ewro, l-applikanti jistgħu jakkwistaw loan akbar skont id-diskrezzjoni tal-bank li jkunu ssieħbu miegħu. 

New Hope hija skema minn sensiela ta’ inizjattivi mmirati biex jassiguraw stabbiltà fis-settur tal-housing u aċċessibilità kontinwa għal kull min jagħmel użu minnha.

Għal aktar tagħrif agħfas dan il-link:

https://housingauthority.gov.mt/mt/scheme/new-hope-scheme/