L-Amministrazzjoni Pubblika tkompli tappoġġja lill-impjegati tagħha permezz ta’ miżuri li jagħmlu differenza f’mumenti diffiċli. Fost dawn hemm id-donazzjoni ta’ sigħat ta’ leave minn Fond Ċentrali, li jipprovdi għajnuna lil impjegati li, minħabba ċirkostanzi umanitarji, ma jkollhomx biżżejjed leave biex ikopru l-assenza tagħhom mix-xogħol.

Din il-miżura tista’ tassisti lil min ikun qed jaffaċċja marda serja li żżommu milli jaħdem, kif ukoll lil impjegati li jkollhom jakkumpanjaw lil uliedhom barra minn Malta għal trattament mediku kruċjali. Jiġu kkunsidrati wkoll każijiet umanitarji oħra. Is-sigħat mogħtija jippermettu li l-perjodu ta’ assenza jkun kopert minn leave mħallas, u b’hekk tittaffa l-pressjoni finanzjarja fuq l-impjegati u l-familji tagħhom.

Il-Fond Ċentrali, amministrat mid-Diviżjoni dwar in-Nies u l-Istandards, jinġabar permezz ta’ donazzjonijiet volontarji ta’ sigħat ta’ leave minn impjegati madwar l-Amministrazzjoni Pubblika. Matul l-2025, madwar 227 talba ngħataw għajnuna permezz ta’ aktar minn 64,000 siegħa ta’ leave, xhieda tas-solidarjetà fost il-kollegi u tal-importanza ta’ din l-għajnuna fil-mumenti l-aktar diffiċli.

Min jixtieq jibbenefika għandu jressaq talba formali lid-Dipartiment tar-Riżorsi Umani tal-ministeru rispettiv, biex din tiġi evalwata mid-Diviżjoni dwar in-Nies u l-Istandards. Għal aktar informazzjoni jew biex jingħataw sigħat ta’ leave, wieħed jista’ jikkonsulta t-Taqsima 1.10 tal-Manual on Work-Life Balance Measures, jikkuntattja lid-Direttur responsabbli mill-People Management jew lill-One-Stop-Shop għall-Uffiċjali Pubbliċi fuq 22001225 jew [email protected].