Għawdex issa għandu l-ewwel bypass tiegħu li se jkun qed jgħaqqad il-belt Victoria mat-triq ta’ Marsalforn; proġett li l-għan warajh huwa li jittaffa l-volum qawwi ta’ traffiku li ta’ kuljum jgħaddi miċ-ċentru tal-belt Victoria. Il-kostruzzjoni ta’ dan il-bypass kien proġett ambizzjuż u impenjattiv, iżda ma kienx nieqes mill-isfidi. Fost dawn, kien hemm għadd ta’ sejbiet arkeoloġiċi li ġew iddokumentati u ppreservati kollha. Kien hemm ukoll l-isfida tal-ġestjoni tal-ilma tax-xita. Biex tiġi indirizzata din il-problema, kellu jinbena kanal tal-ilma. Apparti hekk, kellu jinbena pont biex tiġi salvata barriera li nstabet fl-inħawi, li wkoll se tkun tkun qed tintuża biex jinġabar l-ilma tax-xita. 

Min-naħa l-oħra, issa nbeda wkoll ix-xogħol fuq it-triq ta’ Marsalforn innifisha. B’rabta ma’ dawn ix-xogħlijiet tneħħiet l-infrastruttura tat-telekomunikazzjoni li kienet installata qrib wisq tal-wiċċ tat-triq. Biex sar dan ix-xogħol, l-infrastruttura temporanja kellha proviżorjament tiġi mgħoddija mal-ġenb tat-triq, u b’hekk in-nies li jgħixu Marsalforn baqgħu jingħataw is-servizz mingħajr xkiel. Issa li dan ix-xogħol tlesta, beda x-xogħol fuq l-installazzjoni ta’ servizzi ġodda u l-bini mill-ġdid tat-triq. Dan ix-xogħol għandu jkun lest sat-tieni nofs tas-sena d-dieħla. 

Ta’ min jirrimarka li wara li nħarġu l-permessi relevanti mill-Awtorità tal-Ippjanar, u fuq inizjattiva tal-Ministru għal Għawdex u l-Ippjanar, tkomplew id-diskussjonijiet ma’ Din l-Art Ħelwa biex tiġi salvata iktar art u jinqalgħu l-inqas ammont ta’ siġar possibbli. B’rabta ma’ dan, instabet rotta aktar pittoreska għaċ-ċiklisti. Għaldaqstant, il-maġġorparti ta’ din ir-rotta se tiġi mgħoddija minn pajsaġġi rurali, filwaqt li parti żgħira mill-imsemmija rotta se tkun mgħoddija mal-ġenb tat-triq. Apparti hekk, partijiet tat-triq li llum huma wiesa’ u ma hemmx ħtieġa għall-użu tagħhom se jiġu kkonvertiti lura għal art bil-ħamrija. Għaldaqstant, f’dawn iż-żoni se jinżergħu għadd ta’ siġar u arbuxelli.