Servizzi aktar aċċessibbli, ambjenti moderni u assistenza personalizzata. Dan huwa l-impenn ta’ Servizz.gov biex ikompli jqarreb is-servizzi tal-Gvern lejn iċ-ċittadini.

Iċ-ċentru ta’ Servizz.gov fiż-Żejtun issa jinsab f’post ġdid, fil-binja AM Business Centre, Triq il-Labour, iż-Żejtun. Permezz ta’ dan it-titjib, il-klijenti jistgħu jinqdew b’mod aktar effiċjenti u f’ambjent li joffri aktar privatezza, kumdità u sigurtà.

Din il-ħidma tifforma parti minn investiment usa’. Mill-2023 sal-lum, Servizz.gov investa €1.3 miljun fil-ftuħ ta’ ċentri reġjonali ġodda, kif ukoll fir-rinnovar u l-immodernizzar ta’ ċentri eżistenti.

Illum, Servizz.gov għandu 27 ċentru madwar Malta u Għawdex, li joffru lill-pubbliku aċċess għal mijiet ta’ servizzi tal-Gvern minn post wieħed. Kemm jekk għandek bżonn informazzjoni dwar benefiċċji soċjali, pensjonijiet, edukazzjoni jew servizzi oħra, tista’ ssib l-assistenza li teħtieġ mingħajr ma jkollok għalfejn tmur minn dipartiment għall-ieħor.

Minbarra ċ-ċentru taż-Żejtun, tista’ żżur ċentri f’diversi lokalitajiet, fosthom il-Belt Valletta, Birkirkara, il-Mosta, ir-Rabat, Raħal Ġdid, Ħaż-Żabbar u r-Rabat, Għawdex.

Għal min jippreferi jaċċessa s-servizzi mill-kumdità ta’ daru, Servizz.gov joffri wkoll il-portal elettroniku, il-Freephone 153 u mezzi oħra ta’ komunikazzjoni.

Sib iċ-ċentru l-aktar viċin tiegħek! Żur www.servizz.gov.mt/mt/hubs biex issib l-indirizzi, il-ħinijiet tal-ftuħ u aktar informazzjoni dwar iċ-ċentri kollha.

Servizz.gov – servizz aktar qrib tiegħek, fejn u meta jkollok bżonnu.