Infetħu n-nomini għall-Premju Soċjetà Ġusta 2026, inizjattiva li tirrikonoxxi l-ħidma ta’ persuni u organizzazzjonijiet li jagħtu kontribut importanti biex tinbena soċjetà aktar inklussiva, aċċessibbli u b’opportunitajiet indaqs għall-persuni b’diżabilità.

Dan il-premju għandu l-għan li jagħti ġieħ lil dawk li, permezz tal-impenn u l-inizjattivi tagħhom, jgħinu biex jitneħħew l-ostakli, jissaħħu d-drittijiet u tiżdied il-parteċipazzjoni tal-persuni b’diżabilità fil-ħajja ta’ kuljum.

In-nomini huma miftuħa f’ħames kategoriji, li jirrikonoxxu kumpaniji u impjegati li jippromwovu l-inklużjoni fuq il-post tax-xogħol, l-eċċellenza u l-inklużjoni fl-isport, fl-arti u fil-kultura, kif ukoll il-kontribut ta’ għaqdiet volontarji.

Il-pubbliku huwa mħeġġeġ jinnomina persuni u organizzazzjonijiet li qed jagħmlu differenza pożittiva fil-komunità. Permezz ta’ dan il-premju, tingħata wkoll viżibilità lil inizjattivi li jistgħu jispiraw lil oħrajn biex jippromwovu l-inklużjoni.

In-nomini jagħlqu nhar it-Tnejn, 2 ta’ Novembru 2026, f’nofsinhar.

Il-formoli u l-linji gwida huma disponibbli fuq www.inkluzjoni.gov.mt, filwaqt li n-nominazzjonijiet għandhom jintbagħtu fuq [email protected].