Is-Servizz Nazzjonali tat-Trasfużjoni tad-Demm jingħata l-Premju tal-kwalità tas-Servizz Pubbliku

Is-Servizz Nazzjonali tat-Trasfużjoni tad-Demm (NBTS) huwa l-uniku bank tad-demm liċenzjat fil-Gżejjer Maltin. Id-demm minn donaturi volontarji u mhux remunerati jinġabar, jiġi pproċessat fil-komponenti differenti, u ttestjat għall-gruppi tad-demm u mard li jinġarr mid-demm. Isiru wkoll numru ta’ quality checks skont il-linji gwida maħruġa mill-European Directorate for the Quality of Medicines & HealthCare (EDQM), u wara l-komponenti jitqassmu l-isptar. Il-kura li nieħdu fil-preparazzjoni tad-demm tassigura l-aħjar kwalità ta’ servizz lid-donaturi u lill-pazjenti tagħna, li għalihom dan l-aħħar l-NBTS ingħata wkoll il-Public Service Quality Award.

Il-missjoni tal-NBTS hija li jipprovdi provvista ta’ demm sigura u sostenibbli lill-abitanti tal-Gżejjer Maltin. Għal dan il-għan, regolarment jiġu organizzati għadd ta’ inizjattivi biex ilaħħqu mad-domanda kostanti għat-trasfużjoni. Waħda minn dawn l-inizjattivi hija l-jum Dinji tad-donaturi tad-demm li jiġi ċċelebrat internazzjonalment kull sena fl-14 ta’ Ġunju. F’Malta, saru diversi avvenimenti biex jitfakkar dan il-jum, fosthom ċerimonja ppreseduta mill-E.T. il-President Myriam Spiteri Debono, li matulha donaturi rġiel li taw id-demm 100 darba, u donaturi nisa li taw id-demm 50 darba rċevew rikonoxximent għall-ħajjiet kollha li għenu biex isalvaw bid-donazzjonijiet regolari tagħhom. Saret ukoll quddiesa fis-Santwarju ta’ Pinu f’Għawdex u numru ta’ binjiet prominenti fil-gżejjer inxtegħlu bl-aħmar f’ġieħ id-donaturi tad-demm.

Eżerċizzju ieħor importanti li sar dan l-aħħar huwa r-reviżjoni u l-aġġornament tal-linji gwida dwar l-eliġibilità tad-donazzjoni tad-demm bil-għan li aktar individwi jkunu jistgħu jsiru donaturi potenzjali tad-demm. Dawn il-bidliet huma strutturati fuq prinċipji mediċi bbażati fuq l-evidenza rigward l-effetti ta’ mediċini partikolari fuq id-demm mogħti. L-impjegati tal-NBTS ikkollaboraw ma’ istituzzjonijiet rinomati barra mill-pajjiż biex jassimilaw l-aħjar prattiċi. Il-kriterji estiżi jinkludu t-tneħħija ta’ restrizzjonijiet biex wieħed jagħti d-demm meta jingħata riċetta għal ċerti klassijiet ta’ mediċini, bħal mediċini li joqtlu l-uġigħ magħrufa bħala NSAIDs (mediċini antiinfjammatorji mhux sterojdi), u antidipressanti magħrufa bħala SSRIs (inibituri selettivi tal-assorbiment mill-ġdid ta’ serotonin). Medikazzjonijiet oħra li issa huma permessibbli huma dawk preskritti biex jikkontrollaw id-dijabete, biex jikkuraw il-gotta, u medikazzjonijiet li jgħinu fil-waqfien mit-tipjip.

Dawn l-inizjattivi, il-promozzjoni tal-jum Dinji tad-donaturi tad-demm u l-bidliet fil-linji gwida għall-eliġibililtà, huma intiżi biex iħeġġu aktar donaturi biex jippruvaw jagħtu d-demm, u b’hekk jgħinu lill-NBTS fil-missjoni tiegħu li jiżgura li jkun disponibbli demm sigur għall-pazjenti kollha.

Għal aktar informazzjoni dwar il-linji gwida aġġornati, jew biex wieħed jistaqsi kwalunkwe mistoqsija oħra, wieħed għandu jikkuntattja liċ-Ċentru tal-għoti tad-demm fuq 22066201, 79307307 jew freephone 80074313. Il-pubbliku huwa mfakkar li ċ-Ċentru tal-għoti tad-demm huwa miftuħ kuljum, inkluż il-Ħdud u l-festi pubbliċi, bejn it-08:00 u s-18:00. Is-sessjonijiet tal-għoti tad-demm f’Għawdex isiru fil-Berġa tax-Xewkija nhar ta’ Ħadd filgħodu u t-Tlieta ta’ waranofsinhar, bid-dati eżatti jkunu disponibbli mis-sit elettroniku tagħna https://blood.gov.mt/. Wieħed għandu dejjem iġib identifikazzjoni tar-ritratti valida (eż. il-Karta tal-Identità Maltija).