X’hemm isbaħ minn jum li fih tiltaqa’ ma’ min jipproduċi l-ikel tagħna, idduq prodotti lokali u tgawdi atmosfera ta’ divertiment Malti? Nhar il-Ħadd, 11 ta’ Ottubru, mill-10 a.m. sal-5 p.m., il-Pitkalija, Ta’ Qali, se terġa’ tilqa’ lill-pubbliku għall-Festa Ikel Malti, organizzata mill-Malta Food Agency.

Matul il-jum, il-produtturi tal-ikel Maltin u Għawdxin se jkunu fiċ-ċentru tal-attenzjoni. Il-viżitaturi se jkunu jistgħu jiskopru firxa ta’ prodotti, jippruvaw togħmiet differenti u jitkellmu mal-persuni responsabbli mill-ikel ta’ pajjiżna. Hija opportunità biex insiru nafu aħjar il-prodotti lokali u l-ħidma li ssir biex jaslu fuq il-mejda tagħna.

Il-kċina se tieħu l-ħajja wkoll permezz ta’ sessjonijiet ta’ tisjir fuq il-post. Koki esperti se jużaw ingredjenti lokali biex jippreparaw xi platti quddiem il-viżitaturi u jaqsmu magħhom ideat dwar kif jistgħu jgawdu dawn il-prodotti f’darhom.

Il-programm ikompli b’wirjiet ta’ żfin tradizzjonali, arti performattiva u divertiment matul il-jum. Se jkun hemm ukoll spazju għall-organizzazzjonijiet lokali biex jaqsmu mal-pubbliku l-ħidma u l-inizjattivi tagħhom.

Għat-tfal se jkun hemm ħafna attivitajiet ukoll, fosthom ferrovija tat-tfal, crafts bir-ramel, trampolin, bouncy castle, laqgħa ma’ Fonzu l-Fenek u ħafna iżjed logħob u attivitajiet. B’hekk, il-familja kollha tista’ tqatta’ ġurnata flimkien, b’xi ħaġa għal kull età.

Id-dħul għall-Festa Ikel Malti huwa b’xejn, u se jkun disponibbli wkoll servizz ta’ park-and-ride.

Ħudu nota tad-data: il-Ħadd, 11 ta’ Ottubru, mill-10 a.m. sal-5 p.m., fil-Pitkalija, Ta’ Qali. 

Ejjew niltaqgħu biex niċċelebraw l-ikel Malti u n-nies li jagħmluh possibbli.

Ejjew bil-ġuħ!