​Qed jiġri li l-bnedmin u l-annimali qed idumu iżjed biex ifiqu minn infezzjonijiet minkejja l-użu tal-antibijotiċi. Qed ikollhom jintużaw dożi dejjem akbar ta’ antibijotiċi u li xi drabi xorta ma jaħdmux sew. Din tissejjaħ reżistenza għall-antibijotiċi (antibiotic resistance). Din ir- reżistenza għall-antibijotiċi tiżdied bi prattiċi ħżiena bħal dawn li se nsemmu:

• ​​​Użu bla bżonn mingħajr riċetta tal-v​eterinarju.​
  
• Użu mhux kif indikat, pereżempju mhux skont il-kwantitajiet neċessarji (inqas jew iżjed milli suppost), jew għal numru ta’ ġranet inqas minn kemm suppost.
• Użu preventiv biex ipatti għal mard ikkawżat minn problemi li jistgħu jiġu solvuti b’mod ieħor, pereżempju nuqqas ta’ ndafa u ventilazzjoni, u temperaturi mhux adattati.
• Tixrid tal-antibijotiċi fl-ambjent, minħabba antibijotiċi skaduti u permezz tal-ħmieġ tal-annimali. Dan jista’ jkollu fih fdaljiet tal-antibijotiċi. Eżempji tipiċi ta’ tali tixrid huwa mill-ħmieġ tal-ħamiem tat-tiġrija jew demel fl-għelieqi.
• Kontaminazzjoni mill-batterji reżistenti tal-prodotti tal-ikel ġejjin mill-annimali waqt il-produzzjoni, l-ipproċessar u l-konsum tal-ikel.
• Nuqqas ta’ ndafa, f’ambjenti fejn huwa komuni li ssib tipi differenti ta’ batterji. Eżempju ta’ dawn huma rziezet, guvi tal-ħamiem, sptarijiet tal-bnedmin jew l-annimali.

​

L-użu ħażin ta’ antibijotiċi jwassalhom biex ma jibqgħux jaħdmu fuq l-annimal tal-ikel jew ‘pets.’ Bħala riżultat, m'għadhomx joqtlu l-batterji li jikkawżaw infezzjonijiet fl-annimali. Il-batterji li ma jinqatlux mill-antibijotiċi jissejħu batterji reżistenti u jistgħu jinfirxu fuq il-bnedmin ukoll.

Għax il-batterji m’għandhomx fruntieri. Jinxterdu mill-ikel, mill-ambjent, minn bniedem għal bniedem u minn annimal għal bniedem. Fattur jaffettwa lil ieħor; Dan huwa l-prinċipju ‘Ta’ Saħħa Waħda’ (‘One Health’).

Il-Ministeru għas-Saħħa u l-Ministeru għall-Agrikoltura, Sajd u Drittijiet tal-Annimali qed jaħdmu flimkien biex iwettqu pjan nazzjonali maqbul bejniethom sabiex flimkien jiġġieldu dil-problema serja. Il-Kummissjoni Ewropea, l-FAO u l-WHO qegħdin jaħdmu flimkien biex id-dinja kollha tiġġieled din il-“pandemija.”