Il-Prim Ministru Robert Abela ltaqa’ mar-rappreżentanti tal-MCESD biex jiddiskuti l-prijoritajiet tal-Gvern għal din il-leġiżlatura, b’enfasi fuq id-djalogu soċjali, l-implimentazzjoni tal-Viżjoni Malta 2050 u t-tisħiħ tal-kwalità tal-ħajja.

Matul il-laqgħa, il-Prim Ministru saħaq fuq l-importanza tal-imsieħba soċjali fit-tfassil ta’ politika li tagħti ċertezza, stabbiltà u direzzjoni ċara lill-pajjiż. Huwa tenna li l-Gvern se jkompli jaħdem b’mod konsultattiv, kif sar f’mumenti kruċjali bħall-pandemija u fit-tfassil tal-Viżjoni Malta 2050.

Il-Kap tas-Servizz Pubbliku, Tony Sultana, enfasizza r-rwol ċentrali tal-amministrazzjoni pubblika biex il-prijoritajiet nazzjonali jinbidlu f’azzjoni konkreta.

“L-amministrazzjoni pubblika hija lesta li tisma’, imma fuq kollox li tmexxi l-implimentazzjoni meħtieġa. Tmexxija moderna tfisser li noħolqu viżjoni ċara, nieħdu deċiżjonijiet b’kuraġġ fejn ikun hemm bżonn, u niffaċilitaw il-bidla neċessarja biex Malta tibqa’ kompetittiva, inklussiva u sostenibbli,” qal Tony Sultana.

Il-laqgħa enfasizzat ukoll li l-programm ta’ ħidma tal-Gvern huwa wieħed ambizzjuż u riformista, b’fokus fuq is-saħħa, l-edukazzjoni, il-mobbiltà sostenibbli, l-ambjent, id-diġitalizzazzjoni u l-benesseri tan-nies.

Min-naħa tiegħu, is-Segretarju tal-Kabinett, Ryan Spagnol, qal li diġà nbeda x-xogħol biex jiġu implimentati l-miżuri tal-Manifest Elettorali, flimkien ma’ miżuri oħra li kienu diġà għaddejjin. Huwa rrefera wkoll għall-Wellbeing Index, li għandu l-għan li jtejjeb il-kwalità tal-ħajja b’25%.

Din il-laqgħa tikkonferma l-impenn li d-djalogu soċjali jibqa’ element ewlieni fil-mod kif il-pajjiż jimxi ’l quddiem. Għas-Servizz Pubbliku, dan ifisser rwol ċar: li jisma’, jikkordina u jwettaq il-bidliet meħtieġa biex il-prijoritajiet tal-Gvern jaslu għand iċ-ċittadin.