Fl-okkażjoni tal-Jum Dinji tad-Donazzjoni tal-Organi, aktar persuni ġew imħeġġa jirreġistraw bħala donaturi tal-organi, filwaqt li ġie mfakkar li donatur wieħed jista’ jgħin biex jiġu salvati sa tmien ħajjiet.

Waqt laqgħa ma’ persuni li rċevew trapjant, donaturi rreġistrati u familji ta’ donaturi tal-organi, ingħatat attenzjoni lill-isfidi li jiffaċċjaw pazjenti li jkunu qed jistennew trapjant. Fl-2024, 8,591 pazjent madwar l-Ewropa mietu waqt li kienu qed jistennew trapjant, u dan ikompli jenfasizza l-importanza li jiżdied in-numru ta’ donaturi rreġistrati.

Familji ta’ donaturi li ħallew din id-dinja qasmu wkoll l-esperjenzi tagħhom, fosthom l-appoġġ li rċevew mill-ħaddiema tal-isptar u s-sens ta’ kburija li l-organi tal-għeżież tagħhom setgħu jgħinu biex jiġu salvati ħajjiet oħra.

Ir-reġistrazzjoni bħala donatur tal-organi llum tista’ tgħin biex jiġu salvati ħajjiet fil-futur u tħalli wirt importanti għal oħrajn.

Ir-Reġistru Nazzjonali tad-Donazzjoni ta’ Organi u Tessuti Umani, imwaqqaf fl-2016 u mmexxi mis-Sovrintendenza tas-Saħħa Pubblika, bħalissa jinkludi 30,548 donatur tal-organi rreġistrat. Matul dawn l-aħħar sentejn u nofs, aktar minn 2,410 persuni ngħaqdu mar-reġistru wara diversi inizjattivi ta’ għarfien.

Ir-reġistrazzjoni saret aktar faċli permezz ta’ organdonation.gov.mt, fejn persuna tista’ tirreġistra b’mod sigur fi ftit minuti permezz tal-e-ID tagħha.

Għal aktar informazzjoni żur organdonation.gov.mt.