Matul is-sena tal-2025, il-Knisja  ċċelebrat is-Sena tal-Ġublew tat-Tama fil-Vatikan. L-avvenimenti ħajru eluf ta’ pellegrini Maltin biex jipparteċipaw aktar mis-soltu fil-pellegrinaġġi/attivitajiet formali u informali f’Ruma, b’mod partikolari fil-Vatikan. Ta’ min isemmi li saru mhux inqas minn 37 attività tematika, bħall-Ġublew tal-adolexxenti li sar f’April u l-Ġublew taż-Żgħażagħ li sar f’Lulju u Awwissu, fejn għal dawn iż-żewġ avvenimenti attendew ’il fuq minn 900 parteċipant Malti. Il-preżenza ta’ daqstant Maltin ħolqot il-bżonn ta’ kordinament aktar effettiva, sabiex jiġu żgurati s-sigurtà u l-benesseri tagħhom barra minn Malta.

Għalhekk, l-uffiċjali pubbliċi tad-Direttorat għas-Servizzi Konsulari u Maltin li Jgħixu Barra ħadmu mill-qrib mal-Ambaxxata ta’ Malta f’Ruma u mal-Ambaxxatur ta’ Malta għas-Santa Sede biex jinħoloq pjan ċentrali ta’ komunikazzjoni u assistenza għall-pellegrini. Dan il-kordinament kien essenzjali biex il-Maltin jingħataw informazzjoni ċara u prattika qabel il-vjaġġ tagħhom, partikolarment dwar proċeduri li għandhom isegwu f’każijiet ta’ emerġenza: bħat-telf ta’ dokumenti, is-serq, jew il-problemi tas-saħħa. L-għan ewlieni kien li kull ċittadin Malti jħossu ssalvagwardjat anke meta jkun ’il bogħod minn daru.

Id-Direttorat ħejja fuljett speċjali bil-Malti u bl-Ingliż, li tpoġġa fuq is-sit elettroniku consularplus.gov.mt u tqassam fost il-komunitajiet reliġjużi u l-gruppi tal-pellegrinaġġi. Saru wkoll laqgħat estensivi mal-Kurja ta’ Malta u ta’ Għawdex sabiex l-informazzjoni tasal b’mod uniformi u affidabbli għand il-pubbliku. L-uffiċjali tad-Direttorat ipparteċipaw f’diversi programmi tax-xandir biex iqarrbu s-servizzi konsulari lejn il-pubbliku b’mod dirett u aċċessibbli.

Bis-saħħa ta’ din il-ħidma kkordinata ta’ dawn l-uffiċjali pubbliċi, ma ġie rreġistrat l-ebda każ konsulari maġġuri, filwaqt li żdied b’mod ċar l-għarfien aċċessibbli għall-ivvjaġġaturi sabiex dawn jiżguraw ruħhom li għandhom il-preparamenti meħtieġa kemm qabel kif ukoll matul il-ġita tagħhom. Dan ikompli juri l-impenn kontinwu tal-istituzzjonijiet Maltin favur il-protezzjoni taċ-ċittadini Maltin, kemm f’Malta kif ukoll lil hinn minnha.