​‘Counting on You!’ – Din hija t-tema li s-Servizz Pubbliku addotta għall-kampanja tiegħu fi Freshers’ Week ta’ din is-sena, kemm fl-Università ta’ Malta kif ukoll fl-MCAST. Din il-parteċipazzjoni fil-Freshers’ Week hi metodu ieħor ta’ kif is-Servizz Pubbliku jasal għand il-klijenti tiegħu, din id-darba l-istudenti Universitarji.

Fl-istand wieħed isib informazzjoni ta’ kif student jista’ jibbenefika minn scholarships u jitlob għajnuna dwar l-istipendji. Permezz tat-traineeships offruti mill-Istitut għas-Servizzi Pubbliċi, studenti jistgħu jkollhom ukoll l-opportunità ta’ xogħol part time mas-Servizz Pubbliku, fil-qasam li l-istudent ikun qed jistudja għalih. Dan joffrilu esperjenza prattika tax-xogħol filwaqt li jservi bħala sors tad-dħul.

Għal din is-sena, l-istudenti jistgħu jidħlu fiċ-ċans jirbħu iPad Air 5 billi jtellgħu ritratt mill-istand u jsegwu l-paġna tas-Servizz Pubbliku fuq Instagram. Aktar informazzjoni, kemm dwar il-kompetizzjoni kif ukoll fuq tagħrif ieħor li japplika għall-istudenti, jingħata mill-uffiċjali pubbliċi preżenti fuq l-istand.​