Waħda mill-ewwel binjiet li nbnew fil-Belt wara l-Assedju l-Kbir. L-istorja tal-Berġa ta’ Kastilja dejjem kienet sinonima mal-amministrazzjoni tal-pajjiż, fosthom mal-Uffiċċju tal-Prim Ministru f’dawn l-aħħar ħamsin sena. Kien eżattament fis-6 ta’ Marzu 1972 li din l-binja maestuża bdiet tintuża mill-Prim Ministru bħala l-uffiċċju tiegħu. Fil-preżent, Kastilja huwa wkoll il-post fejn jitlaqqa’ l-Kabinett tal-Ministri u fejn titmexxa l-amministrazzjoni pubblika, li tinkludi l-uffiċċju tal-Kap taċ-Ċivil.

Isimha propja huwa l-Berġa ta’Kastilja, Leon u Portugal. L-ewwel tnejn huma reġjuni Spanjoli. Dan l-isem ġej mill-fatt li din il-berġa kienet tospita Kavallieri ġejjin minn dawn l-postijiet. Il-binja li hemm illum nbniet bejn l-1741 u l-1745. Qabilha kien hemm berġa oħra li nbniet fl-1573 mill-arkitett Ġlormu Cassar.

Il-Berġa ta’Kastilja hi mibnija fuq stil Barokk u fl-aħħar snin sar restawr estensiv kemm fuq barra tagħha, kif ukoll fil-bitħa. Fatt interessanti huwa li qabel nbniet l-ewwel binja, il-Kunsill tal-Ordni ta’ San Gwann kien iddiskuta pjan biex fis-sit jinbena l-Palazz tal-Gran Mastru u fis-seklu għoxrin kien hemm l-ħsieb li l-Parlament jigi rilokat fl-imsemmija berġa.

Fil-perjodu qasir tal-ħakma Franċiża, il-berġa ntużat bħala kwartieri tal-uffiċjali u parti minnha bħala l-uffiċċju tal-Kummissjoni biex tmexxi l-propjetà u l-artijiet li kienu għand l-Ordni ta’ San Ġwann. Matul il-perjodu kolonjali Ingliż, il-berġa ntużat bħala l-kwartieri tal-Armata Ingliża f’Malta u dan kien bejn l-1859 u l-1970.

Fl-istorja tagħha l-Berġa ġarrbet ħsarat estensivi darbtejn. Fil-11 ta’Jannar tal-1693 waqt terremot qawwi seħħew xi ħsarat konsiderevoli l-aktar fil-ġenb tan-naħa ta’ Triq il-Merkanti. Waqt l-eqqel tat-Tieni Gwerra Dinjija fis-7 ta’April 1942, bomba ta’ kalibru qawwi farrket dak li kien it-torri tas-sinjali, kissret it-taraġ prinċipali u saret ħsara fil-ħajt tal-bitħa.