Infetħu n-nominazzjonijiet għall-Premju Anzjanità Attiva 2026, li jirrikonoxxi individwi, organizzazzjonijiet u inizjattivi li qed jagħtu kontribut pożittiv fil-qasam tal-anzjanità attiva f’Malta u Għawdex.

Dan il-premju annwali jifforma parti mill-attivitajiet li jsiru matul ix-xahar ta’ Ottubru, xahar iddedikat lill-persuni anzjani. Il-premjijiet jiċċelebraw l-impenn, id-dedikazzjoni u l-eċċellenza fil-qasam tal-anzjanità attiva, filwaqt li jħeġġu kultura ta’ rispett, innovazzjoni u kollaborazzjoni li tgħin lill-persuni anzjani jibqgħu attivi u parteċipi fil-komunitajiet tagħhom.

Għall-edizzjoni tal-2026, in-nominazzjonijiet qed jintlaqgħu f’sitt kategoriji: il-Premju Anzjanità Attiva, il-Premju Innovazzjoni u Teknoloġija fl-Anzjanità, il-Premju Anzjanità Kulturali, il-Premju Anzjanità Sportiva, il-Premju Volontarjat fl-Anzjanità u l-Premju Solidarjetà Interġenerazzjonali.

Kull kategorija tirrikonoxxi aspett differenti tal-anzjanità attiva. Dawn ivarjaw minn persuni anzjani li jagħtu kontribut pożittiv fil-ħajja ekonomika, ċivika u soċjali, għal proġetti u inizjattivi li jippromwovu l-inklużjoni diġitali, il-kultura, l-isport, il-volontarjat u rabtiet aktar b’saħħithom bejn il-ġenerazzjonijiet.

Il-formola tan-nominazzjoni tista’ tinkiseb miċ-Ċentru Servizz Anzjan, 3, Triq Żekka, il-Belt Valletta, jew miċ-Ċentru Servizz Anzjan f’39, Triq ir-Repubblika, ir-Rabat, Għawdex. Tista’ titniżżel ukoll mis-sit elettroniku aacc.gov.mt jew mill-paġna ta’ Facebook Active Ageing and Community Care.

Il-formoli kompluti jistgħu jintbagħtu bil-posta jew jingħataw lill-Anzjanità Attiva u Kura fil-Komunità, indirizzati lis-Sa Maria Lara Zammit, c/o Active Ageing Unit, Livell 1, Bini FXB, Triq l-Imdina, Ħal Qormi. In-nominazzjonijiet jistgħu jintbagħtu wkoll permezz ta’ email fuq [email protected].

In-nominazzjonijiet jagħlqu fid-9 ta’ Settembru 2026, u applikazzjonijiet li jaslu wara din id-data ma jiġux ikkunsidrati.

Għal aktar informazzjoni jew assistenza biex timtela l-applikazzjoni, wieħed jista’ jċempel fuq 2278 8833 jew jibgħat email fuq [email protected].