Ġie ffirmat ftehim ġdid li jtejjeb il-kundizzjonijiet ta' xogħol għall-impjegati kollha li jaqaw fil-Klassi tal-ICT fis-Servizz Pubbliku. 

Dan huwa d-disa' ftehim kollettiv li ġie ffinalizzat u ffirmat f'dawn l-aħħar xahrejn fis-Servizz Pubbliku, biex b'hekk intlaqtu fil-pożittiv madwar 700 ħaddiem. 

L-impjegati li jaħdmu fil-Klassi tal-ICT fis-Servizz Pubbliku jiffurmaw parti minn wieħed mill-Information Management Units (IMU) li jinsabu mxerrda wieħed f'kull Ministeru. Kull IMU huwa mmexxi minn Chief Information Officer (CIO) u r-rwol ta' kull IMU huwa, fost oħrajn, li jifforma pjanijiet strateġiċi u operattivi li jgħinu biex titwettaq l-istrateġija nazzjonali tat-teknoloġija tal-informatika, jipprovdu s-sapport lill-Ministeri f'dak kollu li għandu x'jaqsam mal-ICT, u jixprunaw il-ħtiġijiet ta' taħriġ meħtieġ f'dan il-qasam.​ 

Dan il-ftehim ġie ffirmat fil-preżenza tas-Segretarju Permanenti Ewlieni, is-Sur Tony Sultana.