Il-proġett MEMORJA, li huwa arkivju orali u awdjoviżiv tal-Arkivji Nazzjonali, issa jista’ jintlaħaq ukoll mill-pubbliku ġenerali permezz tas-sit elettroniku www.memorja.com. F’dan is-sit, wara li tirreġistra bħala utent, tkun tista’ tfittex materjal diġitalizzat li b’hekk qed jiġi ppreservat u kkatalogat. Apparti li tara l-materjal, inti tista’ wkoll tkun protagonist u tikkontribwixxi int ukoll biex dan il-proġett ikompli jikber.

Il-proġett MEMORJA kien stabbilit fl-2017 u huwa l-arkivju orali u awdjoviżiv tal-Arkivji Nazzjonali. Il-missjoni tal-Arkivji Nazzjonali f’dan il-proġett hija li jiġu rekordjati stejjer tal-ħajjiet ta’ nies u gruppi li għandhom rappreżentazzjoni baxxa fl-istorja ddokumentata tal-pajjiż.

MEMORJA juża metodi avvanzati fl-istorja orali, fl-etnografija u fl-arkivistika sabiex jiġu miġbura, irrekordjati, ippreservati u jsiru aċċessibbli l-istejjer individwali u kollettivi li jkunu twasslu s’għandna b’mod orali u anke permezz ta’ awdjo u filmati. Il-proġett ifittex id-diversità tal-memorji, l-istejjer bijografiċi, l-esperjenzi tal-komunità u l-avvenimenti storiċi tal-poplu Malti.

Imħarrġin fl-istorja orali, il-ħaddiema u l-voluntiera tal-proġett MEMORJA jagħmlu xogħol etnografiku kontinwu fil-komunità, u b'hekk iżewqu l-arkivji tagħna b’memorji u tifkiriet, ritratti personali, dokumenti, efemera, oġġetti, awdjo, vidjow u filmati fuq it-tertuqa li ġew iddepożitati u ppreservati, u saru aċċessibbli għal kulħadd.

L-intervisti dwar l-istorja orali li qed isiru mill-ħaddiema tagħna jgħinu sabiex iżidu l-viżibilità tal-Arkivji Nazzjonali u b’hekk jiġu ġġenerati iktar ħbiberiji u relazzjoni unika ta’ fiduċja bejn l-Arkivji ta’ Malta u l-pubbliku.