Is-Servizz Pubbliku qiegħed ikompli jasal għand il-klijenti tiegħu l-ħin kollu u b’metodi mill-iktar konvenjenti. Portal li jwassal informazzjoni utli ħafna u personali lil kulħadd huwa myhealth.gov.mt​.

Dan il-portal huwa mezz kif iċ-ċittadin jingħata aċċess online għar-rekords mediċi kollha li jikkonċernaw lilu, kif ukoll jekk tkun tixtieq tagħti l-istess aċċess lit-tabib personali tiegħek. Kulma trid tagħmel biex taċċessa dawn ir-rekords huwa li tilloggja bl-e-ID tiegħek.

Fost informazzjoni personali li ssib hemm sommarju tal-każijiet kollha tiegħek bid-dati ta’ meta kellek interventi jew appuntamenti l-isptar, lista ta’ appuntamenti li għandek skedati, benefiċċji relatati mal-Pharmacy of Your Choice, kif ukoll ir-riżultati dettaljati tiegħek u immaġni ta’ x-rays li tkun għamilt.

Meta l-klijent jagħti l-istess aċċess lit-tabib personali, it-tabib jirċievi notifika meta jkun hemm riżutati ġodda. Min-naħa tat-tobba, minħabba li dawn ikollhom numru ta’ klijenti abbinati, is-sistema myhealth toffri faċilitajiet ta’ sorting u filtering biex ikunu jistgħu jqabblu r-riżultati.

Is-sistema qed tkun dejjem aġġornata u żżid fil-funzjonijiet aktar ma jgħaddi ż-żmien.

Myhealth hija parti essenzjali mill-istrateġija tas-Servizz Pubbliku li tressaq is-servizzi għand in-nies permezz tad-diġitalizzazzjoni.