L-attività fiżika għandha rwol kruċjali fil-promozzjoni tas-saħħa u l-benesseri ġenerali matul il-ħajja tagħna. Madankollu, skont l-Organizzazzjoni Dinjija tas-Saħħa (WHO), 80% tal-adolexxenti u 31% tal-adulti madwar id-dinja jonqsu milli jilħqu l-livelli rakkomandati. 

Għat-tfal u l-adolexxenti, il-WHO tirrakkomanda mill-inqas 60 minuta ta’ attività moderata sa vigoruża kuljum. Attivitajiet bħall-ġiri, iċ-ċikliżmu, jew il-parteċipazzjoni fl-isports jgħinu biex jinbnew għadam u muskoli b’saħħithom, itejbu s-saħħa tal-qalb, u jagħtu spinta lill-ħiliet konjittivi bħall-memorja u l-konċentrazzjoni. 

Għall-adulti, il-WHO tagħti parir għal 150 - 300 minuta ta’ attività moderata fil-ġimgħa. Li hu madwar nofs siegħa kuljum. Il-konformità ma’ dawn il-linji gwida tista’ tnaqqas ir-riskju ta’ mard tal-qalb, dijabete, u xi kanċers, filwaqt li ttejjeb il-burdata, l-irqad, u s-saħħa mentali.

L-adulti akbar fl-età għandhom jimmiraw għal mill-inqas 150 minuta ta’ attività aerobika ta’ intensità moderata jew 75 minuta ta’ attività aerobika ta’ intensità qawwija kull ġimgħa, jew taħlita tat-tnejn. Barra minn hekk, attivitajiet ta’ tisħiħ tal-muskoli għandhom isiru jumejn jew aktar fil-ġimgħa. Li tibqa’ attiv jgħin biex tinżamm l-indipendenza, jipprevjeni l-waqgħat, u jtejjeb is-saħħa tal-moħħ. 

Kemm jekk ikun mixi, żfin, jew għawm, kull moviment jgħodd. Ibda bil-mod, agħmilha divertenti, u inkorporah fir-rutina ta’ kuljum tiegħek. 

Żur id-Direttorat għall-Promozzjoni tas-Saħħa u l-Prevenzjoni tal-Mard (hpdp.gov.mt) għal pariri u riżorsi prattiċi biex jgħinuk tiċċaqlaq kuljum (hawn). Esplora l-vidjows tagħna dwar l-attività fiżika għal eżerċizzji faċli biex issegwihom (hawn). Barra minn hekk, iċċekkja l-mappa interattiva tagħna biex issib żoni aċċessibbli fejn tista’ timxi, tiġri, jew tgawdi attivitajiet fil-beraħ (hawn).