Malta qed tkompli tagħmel progress b’saħħtu fil-ġestjoni tal-iskart, anke meta wieħed jikkunsidra  r-riżultati pożittivi miksuba fis-snin riċenti tal-iskart. L-isforzi kontinwi mill-familji u n-negozji qed iwasslu għal riżultati tanġibbli skont il-Pjan fit-Tul għall-Ġestjoni tal-Iskart.

L-iskart imħallat naqas b’aktar minn 30%, minn madwar 141 miljun kilogramma għal 95.5 miljun kilogramma. Fl-istess ħin, skart riċiklabbli – inkluż dak miġbur permezz tal-boroż griżi, ħodor, kif ukoll il-ħġieġ – komplew juru titjib sostanzjali, anke meta wieħed iqis l-impatt ta’ inizjattivi privati bħall-Iskema tar-Rifużjoni tal-Kontenituri tax-Xorb.

Is-separazzjoni tal-iskart organiku kompliet tiżdied minn sena għal oħra, u fl-2025 laħqet livell rekord ta’ 30 miljun kilogramma. Dawn ir-riżultati jirriflettu żieda fl-għarfien u parteċipazzjoni attiva mill-pubbliku madwar Malta u Għawdex.

Il-ġbir tal-iskart organiku min-negozji żdied b’mod sinifikanti, minn 263,900 kilogramma fl-2022 għal madwar 6.5 miljun kilogramma mis-sena li għaddiet. L-iskart riċiklabbli mis-settur kummerċjali żdied minn ftit aktar minn miljun kilogramma għal kważi erba’ miljun kilogramma fl-istess perjodu, filwaqt li l-iskart imħallat naqas b’mod moderat u mistenni jkompli jonqos.

It-titjib fis-separazzjoni tal-iskart mill-familji u n-negozji wassal biex madwar 412-il miljun kilogramma ta’ skart ġew evitati milli jintbagħtu fil-miżbliet matul l-aħħar ħames snin.

L-iskart li qed jiġi pproċessat qed jinbidel f’riżorsi ta’ valur. Fl-2025, l-iskart organiku kollu miġbur mid-djar u n-negozji ġie mibdul fi 8.5 GWh ta’ elettriku, biżżejjed biex jipprovdi l-enerġija lil madwar 1,200 dar għal sena sħiħa, kif ukoll f’kompost ta’ kwalità għolja għas-settur agrikolu Malti. L-output totali tal-iskart riċiklabbli laħaq ukoll livell rekord, b’aktar minn 23.5 miljun kilogramma ta’ materjali riċiklabbli, fosthom il-ġibs, il-ħġieġ ċatt u l-injam, fost oħrajn.