Malta Libraries hi l-entità responsabbli għall-Bibljoteka Nazzjonali ta’ Malta, il-Librerija Nazzjonali ta’ Għawdex, l-Uffiċċju Nazzjonali tal-Bibljografija, il-Librerija Pubblika Ċentrali u l-Librerija Pubblika Ċentrali ta’ Għawdex. Flimkien mal-Kunsilli Lokali, taqsam ir-responsabbiltà wkoll għal seba’ libreriji reġjonali kif ukoll 48 librerija tal-fergħa. 

Il-missjoni ta’ Malta Libraries hi li tiżgura l-kollezzjoni u l-konservazzjoni tal-wirt dokumentarju ta’ Malta għall-ġenerazzjonijiet preżenti u futuri, biex tmantni u tiżviluppa l-libreriji regolati taħt l-Att Dwar il-Libreriji Maltin, u biex tinkoraġġixxi l-qari għall-għanijiet ta’ studju, riċerka, żvilupp personali, tagħlim tul il-ħajja, informazzjoni u rekreazzjoni. (Att Dwar il-Libreriji Maltin, l-Att VII tal-2011). 

Il-Bibljoteka Nazzjonali hi librerija ta’ referenza u riċerka, li taħt saqaf wieħed issibilha kollezzjoni estensiva ta’ kotba, ġurnali, gazzetti, manuskritti, mapep u reġistrazzjonijiet viżivi u tal-awdjo minn awturi Maltin. Għaldaqstant hi strumentali fil-preżervazzjoni tal-memorja nazzjonali b’kollezzjonijiet mifruxin fuq sekli, minn żminijiet medjevali sal-era diġitali. 

L-Uffiċċju Nazzjonali tal-Bibljografija joħloq rekords bibljografiċi standardizzati tal-pubblikazzjonijiet kollha sottomessi taħt id-depożitu legali li huma mbagħad ippubblikati kull sena bħala l-Bibljografija Nazzjonali ta’ Malta. 

Il-libreriji pubbliċi joffru varjetà vasta ta’ servizzi li jkopru ċ-ċirkulazzjoni ta’ kotba fiżiċi, kotba elettroniċi, u kotba awdjo u viżivi kif ukoll attivitajiet edukattivi immirati lejn nies ta’ kull età. Kull sena l-popolarità tal-libreriji pubbliċi dejjem qed tiżdied, kemm f’termini tas-self tal-kotba fiżiċi u elettroniċi kif ukoll fil-parteċipazzjoni f’attivitajiet edukattivi. S’issa, hemm iktar minn 1,160,200 ktieb fiżiku u ’l fuq minn 35,000 ktieb elettroniku fil-libreriji pubbliċi u fuq il-Libby app rispettivament.