L-Istitut għas-Servizzi Pubbliċi (IPS) għadu kif ippubblika r-raba’ ħarġa tal-ġurnal tiegħu, li jwassal aktar riċerka u għarfien interessanti f’diversi setturi tas-Servizz Pubbliku.

Din l-edizzjoni fiha riċerka profonda minn riċerkaturi magħrufa — il-Professur Carmel Borg, il-Professur Keith Sciberras u l-Professur Stephen C. Calleya. Dawn il-professuri jipprovdu riċerka dwar it-triq ’il quddiem għal Malta fil-Ġustizzja Soċjali u l-Edukazzjoni; il-Padiljun ta’ Malta għad-59 Wirja Internazzjonali tal-Arti — La Biennale di Venezia; u r-Realtà Ġeostrateġika ta’ Malta, rispettivament.

Dan il-ġurnal uffiċjali jinkludi wkoll artikli interessanti mis-Sur Jake Grech, is-Sa Joanne Gouder, Dott. Patricia Vella Bonanno u s-Sa Liberata Vassallo.

L-IPS ikompli jikkonċentra fuq it-taħriġ u s-servizzi ta’ żvilupp tiegħu, li jiffukaw fuq il-pilastru tal-Iżvilupp Professjonali Kontinwu permezz ta’ riċerka bbażata fuq l-evidenza għal titjib kontinwu fil-forniment ta’ servizz ta’ eċċellenza mis-Servizz Pubbliku.

Kopja tal-ġurnal tal-IPS tista’ tinkiseb elettronikament billi tikklikkja hawn​ jew mil-Librerija tar-Riċerka fl-IPS stess.