​​L-Anzjanità Attiva u Kura fil-Komunità ntroduċiet kura paljattiva mtejba fid-Djar tal-Anzjani tal-Gvern, bi proġett pilota fid-Dar tal-Anzjani tal-Imtarfa. B’dan il-proġett il-kura se tingħata ġewwa d-Dar Residenzjali stess, b’kontroll ta’ sintomi bħal uġigħ, u b’aktar kumdità għall-anzjani tagħna.

Bħalissa, b’kollaborazzjoni ma’ entitajiet oħra, kienet qegħda tingħata kura palljattiva lir-residenti li jbatu mill-kundizzjonijiet li jinkludu l-mard tal-kanċer, Motor Neurone Disease, mard kardijaku, mard respiratorju, mard tal-fwied, kif ukoll mard tal-kliewi. Pero’ l-biċċa l-kbira tar-residenti fil-Care Homes jaffrontaw ukoll kundizzjonijiet oħra, bħad-dimensja, parkinsoniżmu u puplesiji. Meta dawn ir-residenti jaslu fl-aħħar ġimgħat jew jiem ta’ ħajjithom, dawn ir-residenti kien qiegħed ikollhom imorru l-isptar jew f’entitajiet oħra sabiex tingħatalhom din il-kura. Għalhekk inbeda dan il-proġett ta’ kura palljattiva, fejn il-kura sejra tingħata ġewwa d-Dar Residenzjali stess, u se tinkludi kontroll ta’ sintomi bħal uġigħ, qtugħ ta’ nifs, telf ta’ aptit, dardir, rimettar, aġitazzjoni, depressjoni u aċċessjonijiet.

Għal dan il-għan twaqqaf tim għall-kura palljattiva li jikkonsisti minn diversi professjonisti differenti sabiex tingħata kura ħolistika. Biex dan il-proġett seta’ jitwettaq, sar taħriġ fiċ-Ċentru tal-Onkoloġija Sir Anthony Mamo. Ġew imfassla protokolli u proċeduri, kif ukoll ir-responsabbiltajiet li kull kategorija ta’ professjonist għandha fi ħdan it-tim multi dixxiplinarju sabiex titwassal kura palljattiva ħolistika. Inxtara t-tagħmir neċessarju bi spiża ta’ l-fuq minn €4,000. Wara madwar erba’ xhur ta’ analiżi tal-proġett pilota, dan il-proġett sejjer jinfirex fid-Djar Residenzjali kollha tal-Gvern.