L-Awtorità tad-Djar toffri sostenn kontinwu lil kull min jixtri l-ewwel proprjetà tiegħu b’diversi skemi mmirati biex jinkoraġixxu aktar żgħażagħ isiru sidien ta’ djarhom.

Primarjament, l-iskema tal-First-Time Buyers qed igawdi minnha kull min akkwista proprjetà minn Jannar tal-2022 ’il quddiem. Kull individwu li jaqa’ taħt din l-iskema se jkun qed jirċievi għotja ta’ elf ewro fis-sena għal għaxar snin li jammontaw għal għaxart elef ewro. Inizjattiva li se tkompli tagħti garanzija għal stabbiltà u affordabilità fis-settur u serħan il-moħħ liż-żgħażagħ Għawdxin u Maltin.

Inizjattiva bħal din se ttaffi b’mod awtomatiku il-pressjonijiet finanzjarji li individwu jgħaddi minnhom biex jixtri l-ewwel proprjetà tiegħu. Dan filwaqt li ma tillimitax persuna milli tkompli miexja ’l quddiem f’ħajjitha u fil-karriera professjonali tagħha.

Biex tikkwalifika għal din l-iskema, il-proprjetà trid tinxtara b’home loan ma’ wieħed mill-banek Maltin filwaqt li l-istess proprjetà trid tkun reġistrata bħala r-residenza ewlenija tal-applikant. L-applikazzjonijiet huma permessibli jintbagħtu sax-xahar ta’ April wara li tkun akkwistata l-proprjetà. Jiġifieri jekk persuna xtrat darha fl-2024, għandha ċans tapplika għal din l-iskema sa April tas-sena 2025. 

Sal-lum, din l-inizjattiva ġiet milqugħa b’mod pożittiv tant li rreġistraw għaliha madwar ħamest elef u mitejn individwi u familji. 

L-Awtorità tad-Djar kommessa li tibqa’ toffri aktar għajnuniet lill-faxex kollha tas-soċjetà, bil-għan ewlieni jibqa’ l-effiċjenza u servizzi aċċessibbli għax-xerrejja. 

Għal aktar informazzjoni żur il-website housingauthority.gov.mt jew ċempel fuq 2199 1000.

https://www.facebook.com/share/v/Qv2QMHo4iJ642Wbj/