Il-Baġit 2026 jikkonferma mill-ġdid l-impenn ta’ Malta għal sistema ta’ ġustizzja moderna, effiċjenti u ċċentrata fuq iċ-ċittadin. B’allokazzjoni rekord ta’ €93 miljun għas-settur tal-Ġustizzja u r-Riforma fil-Kostruzzjoni, il-pajjiż qed jagħmel progress li mhux biss jidher imma jinħass. Investiment f’infrastruttura ġdida u livelli ogħla ta’ riżorsi umani qegħdin jittrasformaw is-settur tal-ġustizzja: il-kamra tal-ġurati li nfetħet dan l-aħħar ippermettiet smigħ rekord ta’ ġurijiet b’16 li huma diġà konklużi u tnejn skedati sal-aħħar tas-sena, filwaqt li l-faċilitajiet Magisterjali l-ġodda u l-Qorti Kummerċjali li jmiss fil-Belt Valletta juru pjanar fit-tul għal aktar effiċjenza u kompetittività. 

Is-settur issa jimpjega 600 persuna, l-akbar numru fl-istorja ta’ pajjiżna, bis-sostenn t’aktar Court Attorneys, Judicial Assistants u membri ġodda fil-ġudikatura.

Żvilupp deċiżiv iehor kien l-akkwist tal-bini eks Downtown Hotel f’Victoria permezz tal-iffirmar tal-konvenju, li ser ikun qiegħed jibdel din il-proprjeta` f’Qorti ġdida u aktar aċċessibli għal Għawdxin. Wara għexieren ta’ snin ta’ diskussjonijiet, dan il-pass finalment joħloq il-bażi għal qorti moderna, aċċessibbli u adattata għall-bżonnijiet tal-lum. Din il-qorti ġdida tirrifletti d-determinazzjoni tal-Gvern li jaġixxi b’serjetà u jkompli jattwa f’riżultati tanġibbli. Malta tibqa’ tagħżel triq fejn is-saltna tad-dritt tissaħħaħ permezz ta’ investiment, effiċjenza u tmexxija soda.