Il-kampanja ‘Beat the Heat,’ imnedija mid-Direttorat għall-Promozzjoni tas-Saħħa u l-Prevenzjoni tal-Mard (HPDP), għandha l-għan li tqajjem għarfien dwar ir-riskji għas-saħħa marbuta mal-mewġiet ta’ sħana, u tipprovdi pariri prattiċi biex in-nies jibqgħu siguri matul ix-xhur sħan tas-sajf.

Mewġa ta’ sħana hija definita bħala tlett ijiem konsekuttivi jew aktar li matulhom it-temperaturi matul il-jum jaqbżu l-medja ta’ kull xahar b’mill-inqas 5°C. Temperaturi ogħla jżidu r-riskju ta’ mard marbut mas-sħana, li jaffettwa kemm is-saħħa fiżika kif ukoll dik mentali.

Il-kampanja tippromwovi messaġġi ewlenin biex jitnaqqas l-impatt tat-temp sħun. Dawn jinkludu:

1. Evita li toħroġ barra matul is-sigħat l-aktar sħan (madwar il-11:00 sal-16:00).
2. Ilbes ħwejjeġ ħfief u ta’ kulur ċar, kpiepel b’xifer wiesa’, nuċċali tax-xemx u sunblock meta tkun barra.
   
3. Ħu doċċi/banjijiet friski, uża cold packs, xugamani mxarrbin, sponging jew banjijiet għas-saqajn biex tiffriska.
   
4. Ibqa’ idratat – ixrob l-ilma regolarment u evita l-alkoħol, xarbiet bil-kafeina u xarbiet biz-zokkor.
   
5. Kul ikliet żgħar u frekwenti u agħżel ikel b’kontenut għoli ta’ ilma, bħal frott u ħaxix (eż. dulliegħ, ħjar).
   
6. Immira għal temperaturi fil-kmamar taħt it-32°C matul il-jum u l-24°C matul il-lejl.
   
7. Evita attività fiżika qawwija matul is-sigħat l-aktar sħan.
   
8. Agħraf is-sinjali tal-heat stroke – temperatura għolja, konfużjoni, sturdament, u telf mis-sensi. Ċempel 112, ċaqlaq lill-persuna f’żona aktar friska, iffriskaha bl-ilma jew bis-silġ, u illaxka l-ħwejjeġ sakemm tasal l-għajnuna.
   

Jingħataw linji gwida għal gruppi vulnerabbli, inklużi t-tfal, l-anzjani, persuni b’kundizzjonijiet kroniċi, ħaddiema li jaħdmu barra, u l-annimali domestiċi. Prekawzjonijiet addizzjonali biex jipproteġu lil dawn il-gruppi mill-ħsara marbuta mas-sħana huma enfasizzati matul il-kampanja kollha.

Firxa ta’ materjal edukattiv li jinkludi fuljetti ta’ informazzjoni, mistoqsijiet frekwenti (FAQs) u posters huma disponibbli online kemm bl-Ingliż kif ukoll bil-Malti. Dawn jistgħu jiġu aċċessati mill-paġna elettronika ‘Beat the Heat’ tal-HPDP https://hpdp.gov.mt/beattheheat.