Mat-68,000 persuna fis-sena, turisti, pensjonanti, studenti u tfal tal-iskejjel, familji Maltin jaqsmu lejn din il-parti tax-xatt speċifikament biex iżuru l-Forti Sant’Anġlu. Is-sewwieqa jużaw il-parkeġġ li hemm taħt il-forti, meta huma jżuru x-xatt pittoresk tal-Birgu.

Pellegrini li jimxu sal-Forti Sant’Anġlu bħala parti mir-rotta tal-Camino DeSantiago DeCompostela jżuru wkoll dan is-sit. Ħaddiema li jaħdmu fil-Forti jew li jfornu servizz għall-opri tal-baħar jagħmlu użu wkoll ta’ dan is-sit  ta’ kuljum.

Sa ftit ġimgħat ilu, dawn kollha kienu jużaw l-istess pont però issa, bl-investiment li wettqet Infrastructure Malta, issa dawn kollha ser isibu żewġ pontijiet ġodda – wieħed għal min jimxi u l-ieħor għall-vetturi. 

B’investiment ta’ madwar tliet miljun ewro, Infrastructure Malta daħlet għall-proġett biex tiżviluppa pont pedonali u ieħor għall-vetturi minflok il-pont wieħed li kien hemm qabel u li minn fuqu kienu jgħaddu l-vetturi u n-nies. 

F’Ġunju tas-sena l-oħra, il-pont li kien hemm ingħalaq għall-vetturi wara li parti minnu ġġarrfet. Dak il-pont kien mibni mis-Servizzi Ingliżi u ddiżinjat għal piż ferm inqas milli kien qed jerfa’, bil-vetturi li kienu qed jgħaddu minn fuqu fl-aħħar snin. Apparti hekk, iż-żmien kien għamel bih tant li kellu għadd ta’ ħsarat.

Malli ttieħdet id-deċiżjoni li l-pont jingħalaq għall-vetturi, Infrastructure Malta ddeċidiet li tħottu u minflok pont wieħed tidħol għall-proġett biex jinbnew żewġ pontijiet ġodda; wieħed għall-vetturi u l-ieħor għan-nies biex tingħata aċċessibbiltà sigura lil min ikun qed jimxi fl-inħawi.

Matul il-proġett, Infrastructure Malta għarfet il-valur storiku ta’ dan is-sit u żammet kuntatt dirett mas-Sovrintendenza tal-Patrimonju Kulturali, b’din l-entità kienet involuta mill-bidu nett tal-proġett u kkontribwixxiet fl-oġġettivi u d-disinn, waqt li ssorveljat il-ħidma li għaddejja.