Iċ-Ċentru ta’ Kriżi fi ħdan id-Direttorat għas-Servizzi Konsulari u l-Maltin li  Jgħixu Barra jaħdem bil-għan sabiex jitnaqqsu r-riskji għall-vjaġġaturi Maltin fejn jidħol is-safar lil hinn minn xtutna. Dan jintlaħaq billi jiġu mogħtija pariri dwar l-ivvjaġġar aċċessibbli online, kampanji ta’ informazzjoni, kif ukoll jinżamm kuntatt mal-pubbliku permezz ta’ attivitajiet informattivi biex jissaħħaħ l-għarfien dwar safar aktar sigur.

L-informazzjoni hija l-qalb tal-istrateġija konsulari taċ-Ċentru. Din l-informazzjoni tinħareġ fil-forma ta’ pariri aġġornati u preċiżi, flimkien ma’ linji ta’ gwida ġenerali utli għal meta vjaġġaturi jiffaċċjaw xi intopp.

Barra minn hekk, permezz ta’ kooperazzjoni internazzjonali, iċ-Ċentru jipprovdi assistenza konsulari lill-vjaġġaturi Maltin li jsibu ruħhom fi kriżi barra minn Malta. Madankollu, iċ-Ċentru huwa wkoll responsabbli biex jipprovdi assistenza lil ċittadini barranin jekk dawn isibu ruħhom fi kriżi maġġuri f’ Malta.

Dawn id-dmirijiet jitwettqu permezz ta’ monitoraġġ kontinwu f’dak kollu li jkun għaddej madwar id-dinja, tixrid fil-ħin ta’ informazzjoni u koordinazzjoni bir-reqqa mal-Istati Membri l-oħra tal-Unjoni Ewropea (UE). Dan jiżgura li tkun tista’ tittieħed azzjoni koordinata mill-membri stati.

Kriżijiet huma meqjusa bħala ġrajjiet li ma jkunux mistennija, jisfrattaw il-ħajja ta’ kuljum u li jheddu l-benessri u l-kwalità tal-ħajja. Eżempji ta’ dawn jinkludu diżastri naturali, gwerer u inkwiet ċivili. F’sitwazzjonijiet ta’ kriżi ssir ħidma flimkien mal-Ambaxxati, Kummissjonijiet Għolja u l-Konsulati Maltin tal-pajjiż. F’każijiet fejn ma hemmx rappreżentazzjoni Maltija formali, iċ-Ċentru jikkoopera ma’ Stati Membri oħrajn tal-UE sabiex tiġi provduta l-għajnuna meħtieġa. Fejn issa qed isseħħ safar aktar minn qatt qabel, kif ukoll li żdied l-ivvjaġġar lejn destinazzjonijiet aktar ’il bogħod, jiżdied ir-riskju li vjaġġaturi Maltin jiltaqgħu ma’ xi emerġenza barra mill-pajjiż. Dan jagħmel il-ħidma taċ-Ċentru kruċjali aktar minn qatt qabel, u b’hekk ikun meħtieġ stat ta’ preparazzjoni kostanti għal dak li jista’ jinqala’.

Għal aktar informazzjoni dwar il-ħidma taċ-Ċentru ta’ Kriżi, żur is-Sit ConsularPlus fuq consularplus.gov.mt