Il-Bank tal-leave jservi bħala mezz fejn Uffiċjali Pubbliċi jistgħu joffru s-sapport tagħhom lill-kollegi li jkunu għaddejjin minn sitwazzjonijiet diffiċli fil-ħajja tagħhom minħabba mard jew każijiet umanitarji oħrajn. Dawn jistgħu jinkludu sitwazzjonijiet bħal mard serju li jimpedixxi l-impjegati milli jaqdu dmirijiethom, safar sabiex wieħed jirċievi trattament mediku għalih innifsu jew sabiex jakkumpanja lill-familjari waqt li huma jirċievu t-trattament.

Fl-2024, 189 impjegat ibbenefika minn madwar 53,000 siegħa permezz ta’ din l-inizjattiva.

Din l-inizjattiva hija waħda fost ħafna li jirriflettu l-impenn kontinwu tal-Amministrazzjoni Pubblika biex tissalvagwardja l-benesseri tal-impjegati tagħha. L-Amministrazzjoni toffri numru ta’ miżuri li jippromwovu l-bilanċ favur il-ħajja u x-xogħol, flimkien ma’ servizzi li huma ddisinjati li jipproteġu s-saħħa mentali tal-impjegati.

Din l-iskema toffri l-possibilità li impjegati pubbliċi jikkontribwixxu parti mil-leave jew time-off tagħhom lill-Fond Ċentrali. Imbagħad, dawn is-sigħat jiġu pproċessati u allokati fuq bażi umanitarja lill-kollegi li jkunu għaddejin minn żmien diffiċli u li jkollhom bżonn is-sapport.

L-impjegati pubbliċi kollha huma mħeġġa li jikkunsidraw jagħtu l-kontribuzzjoni tagħhom għax kull donazzjoni tgħin. Individwi jistgħu jikkuntattjaw lid-Dipartiment tar-Riżorsi Umani fil-Ministeru rispettiv tagħhom għal aktar informazzjoni ta’ kif jistħgu jagħtu s-sigħat jew saħansitra kif jibbenefikaw minn din il-miżura, suġġett għall-kriterji tal-eliġibilità applikabbli.

L-impjegati jistgħu jċemplu l-One-Stop-Shop għall-Uffiċjali Pubbliċi fuq 22001225 jew jibagħtu email fuq [email protected] għal aktar informazzjoni.