Servizz.gov nieda verżjoni ġdida u mtejba tal-portal tiegħu, Servizz.gov.mt, b’għodod diġitali ġodda mfassla biex jagħmlu s-servizzi pubbliċi aktar sempliċi, aċċessibbli u personalizzati għall-bżonnijiet taċ-ċittadini.

Il-portal għandu rwol importanti bħala wieħed mill-punti ewlenin ta’ kuntatt bejn il-pubbliku u s-Servizz Pubbliku. Matul is-sena li għaddiet, is-sit irreġistra aktar minn 738,000 utent u ġġenera aktar minn żewġ miljun page view, u dan juri kemm dan is-servizz diġitali huwa essenzjali għall-pubbliku.

Fost il-funzjonalitajiet ġodda hemm il-Benefit Finder, għodda intelliġenti li tgħin lill-utenti jidentifikaw servizzi u benefiċċji li jistgħu jkunu eliġibbli għalihom. Is-servizzi issa huma organizzati wkoll skont avvenimenti importanti fil-ħajja, biex l-utenti jaslu aktar faċilment għal dak li għandhom bżonn.

Il-pjattaforma tinkludi wkoll dashboards personalizzati, booking online għal appuntamenti f’servizzi magħżula, fosthom assistenza fuq taxxa u l-ġbir ta’ karti tal-identità, kif ukoll chatbot għal assistenza immedjata. Is-servizzi kollha huma disponibbli kemm bil-Malti kif ukoll bl-Ingliż.

Il-Kap tas-Servizz Pubbliku, Tony Sultana, qal li dan l-investiment isaħħaħ il-kwalità tas-servizzi offruti liċ-ċittadini u jkompli jibni fuq il-vjaġġ ta’ trasformazzjoni diġitali tas-Servizz Pubbliku. Min-naħa tiegħu, il-Kap Eżekuttiv ta’ Servizz.gov, Massimo Vella, sostna li l-għan huwa li kull persuna tkun tista’ taċċessa s-servizzi tal-Gvern b’mod aktar faċli, effiċjenti u personalizzat.