Id-Dipartiment tar-Relazzjonijiet Industrijali u tal-Impjiegi (DIER) huwa d-dipartiment regolatorju Malti dwar affarijiet relatati mal-leġiżlazzjoni dwar l-impjiegi u r-relazzjonijiet industrijali. 

Ir-rwol ewlieni tad-dipartiment huwa li jipproteġi lill-partijiet involuti f’kuntratt ta’ impjieg u jżomm relazzjoni ta’ impjieg b’saħħitha fi spirtu ta’ sħubija soċjali, u b’hekk jikkontribwixxi għal relazzjonijiet industrijali stabbli, filwaqt li jipprovdi informazzjoni u analiżi lill-gvern dwar liġijiet u miżuri li jittrattaw il-kundizzjonijiet tal-impjiegi u r-relazzjonijiet industrijali.  

Id-dipartiment joffri wkoll is-servizzi tiegħu lill-pubbliku inġenerali, b’mod partikolari dawk li għandhom impjieg jew li l-impjieg tagħhom ġie tterminat, lit-trade unions, prinċipali u assoċjazzjonijiet tal-prinċipali. 

Fl-2024, it-taqsima tal-Customer Care tad-dipartiment wieġbet 14,649 email, serviet 3,122 klijent u wieġbet 25,386 telefonata li rċeviet fuq il-helplines tad-dipartiment.

Id-dipartiment jinvestiga 1202 każijiet ta’ persuni li l-impjieg tagħhom ikun ġie tterminat u anki dawk li jkunu għadhom fl-impjieg u għalhekk għandu l-għan li jirkupra pagi u benefiċċji u ħlasijiet oħra mhux imħallsa u benefiċċji li jkunu dovuti.  L-ammont ta’ claims li saru mid-dipartiment fl-2024 kien ta’ €2,626343.59 filwaqt li l-ammont ta’ pagi li nġabru mid-dipartiment u ngħataw lura lill-ħaddiema bonarjament permezz ta’ medjazzjoni minn-naħa tad-dipartiment kien ta’  €1,668569.87.

Apparti minn hekk, fl-2024 id-dipartiment nieda studju investigattiv relatat mas-settur tal-Pjattaforma Diġitali għall-Konsenja (food couriers). Id-dipartiment ħass il-ħtieġa illi jwettaq studju investigattiv biex tittieħed stampa ta’ x’qed jiġri f’dan is-settur u jittieħdu azzjonijiet neċassarji f’każ li l-kundizzjonijiet tax-xogħol ma jkunux qed jiġu osservati. F’din l-investigazzjoni qed jiġu investigati 49 prinċipal u qed ikunu koperti 1897 impjegat.

Din is-sena id-Dipartiment tar-Relazzjonijiet Industrijali u l-Impjiegi beda jilqa’ applikazzjonijiet u mill-bidu ta’ April bdew jinħarġu l-liċenzji li għall-ewwel darba se jkunu qed jirregolaw aġenziji tal-impjieg li joperaw bħala aġenzija ta’ xogħol temporanju u bħala aġenzija tal-outsourcing. L-iskop ta’ dawn ir-regolamenti huwa biex ikun assigurat illi Aġenziji tal-Impjieg ikollhom l-operat tagħhom regolat u akkontabbli. Fl-2024 inħarġu 135 liċenzja u għaxar operaturi inħarġitilhom liċenzja kundizzjonali.

Irwol ieħor tad-dipartiment huwa li b’approċċ proattiv isolvi tilwim industrijali b’soluzzjoni ta’ sodisfazzjon kemm għall-intrapriża partikolari kif ukoll għall-union involuta, permezz ta’ laqgħat konċiljatorji. Din is-sena saru 28 laqgħa li fi 23 minnhom intlaħaq ftehim.