Il-Bank tal-Leave huwa mezz kif uffiċjali pubbliċi flimkien jistgħu jgħinu uffiċjali oħra li jkunu għaddejjin minn każijiet speċjali. Matul l-2021 kien hemm 169 talba għall-għajnuna li b’kollox ibbenefikaw minn kważi 50,000 siegħa. 

Il-Bank tal-Leave huwa mezz ieħor li juri kif il-benesseri tal-impjegati jibqa’ prijorità għall-Amministrazzjoni Pubblika. Is-Servizz Pubbliku jipprovdi diversi miżuri għal bilanċ bejn il-ħajja u x-xogħol, kif ukoll mekkaniżmi sabiex jissalvagwardjaw il-benesseri u s-saħħa mentali tal-impjegati.

Il-Bank tal-Leave joffri l-possibilità li impjegati pubbliċi jagħtu donazzjoni ta’ sigħat mil-leave jew time-off tagħhom b’mod volontarju lill-Fond Ċentrali. Dawn is-sigħat jiġu utilizzati fuq bażi umanitarja minn impjegati pubbliċi oħra.

Int ukoll tista’ tagħmel id-donazzjoni tiegħek. Impjegati pubbliċi jistgħu jagħmlu kuntatt mad-Dipartiment tar-Riżorsi Umani tal-Ministeru rispettiv tagħhom sabiex jiksbu aktar informazzjoni dwar kif jistgħu jagħtu parti mil-leave jew kif jistgħu jibbenefikaw minn din il-miżura, kif ukoll dwar il-kriterji tal-eliġibilità. 

Impjegati huma mistiedna wkoll iċemplu lill-One-Stop-Shop għall-Uffiċjali Pubbliċi fuq 22001225 jew jibagħtu email lil [email protected]​ għal aktar tagħrif.