​Segretarju Peramanenti, Ministeru għall-Familja, Drittijiet tat-Tfal u Solidarjetà Soċjali

Is-Sur Mark Musù

Is-Sur Mark Musù daħal fis-Servizz Pubbliku fl-1986, fejn serva f’bosta karigi fi ħdan il-Ministeru għall-Familja, Drittijiet tat-Tfal u Solidarjetà Soċjali u fid-Dipartiment tas-Sigurtà Soċjali fl-istess Ministeru. Huwa okkupa diversi pożizzjonijiet f’dan id-Dipartiment, sakemm f’Diċembru tal-2005 inħatar Direttur responsabbli mill-Affarijiet Internazzjonali u tal-Unjoni Ewropea fil-Ministeru għall-Familja u Solidarjetà Soċjali.

F’Novembru tal-2008, is-Sur Musù nħatar Direttur għall-Iżvilupp Strateġiku u Relazzjonijiet Internazzjonali fid-Dipartiment tas-Sigurtà Soċjali, filwaqt li f’Novembru 2012 inħatar Direttur għall-Istrateġija tal-Pensjonijiet. Tul dawn is-snin, is-Sur Musù rrappreżenta lil Malta f’diversi kumitati tal-UE, kif ukoll f’konferenzi u seminars dwar is-sigurtà soċjali.

F’Marzu tal-2013, is-Sur Musù inħatar Segretarju Permanenti fil-Ministeru għall-Familja u Solidarjetà Soċjali u f’Ġunju 2017 reġa nħatar Segretarju Permanenti fil-Ministeru għall-Familja, Drittijiet tat-Tfal u Solidarjetà Soċjali. Fil-preżent huwa wkoll Chairperson tal-Grupp ta’ Ħidma għall-Istrateġija tal-Pensjonijiet, li fost oħrajn għandu l-inkarigu li sal-2020 iħejji rapport strateġiku dwar is-sistema tal-pensjonijiet f’Malta. Is-Sur Musù huwa wkoll membru fuq il-Bord tan-Netwerk tal-Iżvilupp Sostenibbli kif ukoll membru fil-Kumitat Kontra t-Traffikar ta’ Bnedmin.

Is-Sur Musù huwa gradwat fl-Amministrazzjoni Pubblika.